منتدي بحر الكلمات للشعر والأدب ***حلم الصبايا*** قلم الشاعر : المهاجر ( حسين الرفاعي )

حلم الصبايا
....
وقفت على الشط الصبية
ام العيون غارت نجوم
من سحرها
وبين رموشها السود
حلمها المجنون
حلم الصبايا ف سنها
كان وقتها وقت الغروب
والشمس بتغفل
ورأيحه عشها
والنسمة نسمة صيف
مايلة علي الميه
تداعب خدها
وشراع مراكب في الاصيل
رايحه وجايه
من بعيد تندهلها
سارح خيالها
في دنيا تانية
من زمان بتحبها
ندهت وقالت ياأمير
خدني معاك
انا من زمان متشوقه
ميل علي الشط بشراعه
خدها بدراعه وضمها
بص ف عنيها
حبت عنيه
دابت أيديها ما بين ايديه
وف حضنه نامت
صحيت. .ونامت
ماهي عارفه حبه قد ايه
شق الشراع بحر الغرام
وهي لسه ف حلمها
والليل بيفرد ع الوجود
خيمة ماشافت زيها
شايفه القمر
شايفة النجوم
شايفه الهنا بيرقص لها
دنيتها دي
وحبيبها ده
هما أملها وعشقها
صحيت من الحلم الجميل
علي ايد حقيقه تهزها
راحت تدور عن حبيبها
وقعت دموعها
ف حجرها
..........
المهاجر ( حسين الرفاعي )